Impakaammo ni Glen Anthony Guingayan, Sr. Councilor ti Kasibu, Nueva Viscaya nga agtultuloy ti panagbarikada kadagiti mabalin a pangidalanan ti North Luzon Mineral Resources kadagiti aramatenda iti pangpanggependa nga exploration idiay Barangay Pao.
Iti pannakiuman ti Bombo Radyo kenkuana, kinunana nga aglima metten a bulanda nga agbambantay iti nasao a barikada gapu ta saanda a kayat a palubosan ti mining company a mangipatungpal iti exploration activity iti nasao a lugar.
Nangrugi dagitoy nga agbarikada idi Mayo 9 ti agdama a tawen.
Sigun kenkuana, uray no exploration activity laeng ti panggepda iti nasao a lugar, adda latta ti posibilidad iti mining activity kalpasan a makumpirmar ti nasao a kompanya nga adda ti mabalinda a maala sadiay.
Impetteng metlaeng ni Councilor a ti North Luzon Mineral Resources Company (NLRMC) ti maika-innem wenno pito a kompanya a nag-apply a mangipatungpal iti aktibidad iti nasao a lugar no sadino saanda metlaeng a pinatgan dagiti naglabas a kompanya a nangpanggep nga agmina iti nasao a lugar.
Impaganetgetna a saanda a kayat a patgan ti panagminas iti nasao a lugar gapu ta mabigbigbig ti Kasibu kas Citrus Capital of Luzon bayat a mabigbigbig met ti Probinsya ti Nueva Vizcaya kas Ginger Capital of the Philippines.
Malaksid iti dayta, agrikultura ti source of incomeda iti nasao a lugar no sadino mabalin a maapektaran daytoy. Adda metlaeng dagiti potensyal ti nasao a lugar para iti turismo.
Kasano nga ilaok mo ti mining iti maysa nga agricultural area, ken potential tourism?”, sigun kenni Councilor.
Maysa metlaeng kadagiti pakaseknanda ti posible a pannakadadael ti watershed da iti kanito a marugian ti operasyon ti nasao a kampanya. Kinunana a wallo ngamin a barangay ti maapektaran iti kanito a maitulok ti operasyon ti kompanya no sadino kinunana a kaaduan kadagitoy ti saan a pimmabor iti pannakaipatungpal ti minas sadiay.
Inlawlawagna pay nga idi damo ket nangipaay ti Sangguniang Bayan ti Certificate of Consultation iti nasao a kompanya ngem apaman a tiningitingda daytoy babaen metlaeng kadagiti petisyon dagiti umuli, insanodda daytoy iti National Office.
Kinuwestionaran metlaeng ti nasao nga opisyal ti panangipaay ti Department of Environment and Natural Resources (DENR) iti permit iti nasao a mining company.
Impeksana met nga iti agdama, adda ti agarup wallo a barikada iti nasao a lugar, mangipakpakita iti nainget a panangkontrada iti panagminas iti nasao a lugar. //kcs//
