BAGUIO CITY – Malamlamayan ita ti maysa a barito kalpasan a nagkettel iti bukodna a biag iti pagtaenganda sadiay Laya East, Tabuk City, Kalinga idi kanikadua.
Nabigbig daytoy a ni Raygielee Diego Besas, 15-anyos, estudyante ti Grade 9.
Maibasar iti report, naobserbaran ti pamilya ti barito a saan daytoy a makaidna ken rumuar-sumrek iti pagtaenganda iti rabii ti Lunes.
Dinamag daytoy ti kabsatna ngem saan a simmungbat ti barito ken rimuar a nagturong iti likudan ti pagtaenganda.
Binagaanda a sumrek daytoy iti pagtaenganda ngem saan a simmungsungbat ti barito isut gapuna a binaybay-an ti pamilya a nakalukat ti ridaw ken silaw ti balay.
Nakangngeg met ti kaarubada iti naidumduma nga uni manipud iti pagtaengan ti barito iti tengngat rabii idi kalman ken iti parbangon ket nadiskubre ti ina ti barito ti bangkay daytoy.
Nailanad iti report ti pulisya a nagbekkel ti barito iti likudan ti pagtaenganda ken nagaramat daytoy iti nylon a tali.