BAGUIO CITY – PIMMUSAY ti maysa a barito kalpasan a binagsol ti maysa a mannalon sadiay Sitio Bakiwag, Paykek, Kapangan, Benguet idi rabii.
Nabigbig ti biktima a ni Christian Dave Bacdayan Pinas, 15, ken residente ti Paykek, Kapangan, Benguet bayat a ti suspek ket ni Jesus Calbin Gulian, 51, single, ken residente ti Cayapes, Kapangan, Benguet.
Maibasar iti imbestigasyon, adda iti uneg ti kalapaw ni Mackenzie Bay-an ti suspek ken ti biktima idi nakita dagiti testigo a da Norwin Poncian ken Glenson Dulas nga agin-inom iti arak iti ruar ti kalapaw, ti panangipurwak ti suspek iti biktima iti ruar ti kalapaw.
Nakita ni Dulas a nakaiggem ti suspek iti kutsilyo isut gapuna a dagusna nga inala ti kutsilyo ken nakitana ti maysa a bagsol iti barukong ti biktima.
Intarayda ti biktima iti Kapangan District Hospital ngem naideklara a dead on arrival.
Maisagsagana metten ti kaso kontra iti nasao a suspek.
