BAGUIO CITY – Pimmusay ti maysa a barito kalpasan nga aksidente a naidungpar ti imanmanehona a motorsiklo iti maysa nga elf truck sadiay Halsema Highway, partikular sadiay Mount Data, Bauko Mt. Province idi kalman.
Nabigbig daytoy a ni Tony Rickets Diyawyaw Bayawa, 15-anyos, out-of-school youth ken residente ti Sadsadan, Bauko, Mt. Province.
Nabigbig met ti driver ti elf truck nga addaan plaka a WGR 208 a ni Rogelio Bulon Sutil, 36-anyos, naasawaan, mannalon ken residente ti Gambang, Bakun, Benguet.
Maibasar iti report, paturong ni Bayawa sadiay Mt. Data ken idi adda iti nakapasamakan ti insidente ket inokuparna ti linya ti elf truck a paturong met ti direksion ti Bandilaan, Mt. Data a nangitunda iti panagdinnungparda.
Gapu iti daytoy, naideklara a ‘dead on the spot’ ti baritoy gapu iti dunor iti ulona bayat a nadadael ti dua a lugan.
Naiyawid ti biktima iti pagtaenganda bayat a boluntaryo a simmuko iti pulisya ti driver ti nasao nga elf truck.
