Binombaan manen ti danum ti China Coast Guard dagiti barko ti Pilipinas iti asideg ti Scarborough (Panatag) Shoal iti West Philippine Sea para iti supply mission dagitoy.
Dua a dadakkel a bangka ti China Coast Guard ti nagbomba ti danum.
Gapu iti dayta, nadadael ti “canopy” ken “steel railing” ti barko Philippine Coast Guard (PCG) a BRP Bagacay.
Malaksid iti dayta, binombaan pay ti Chinese vessels ti barko a Bureau of Fisheries and Aquatic Resources (BFAR) a karaman metlaeng iti supply mission dagitoy.
Ti barko ti Pilipinas ket paturong iti Scarborough Shoal wenno maaw-awagan metlaeng a Bajo de Masinloc tapno mangipaay ti taraon kasta met ti langis dagiti mangngalap iti nasao a lugar.
Kabayatanna, naipadamag iti maysa a media sadiay China a pinapanaw ti China Coast Guard ti maysa a barko ti Philippine Coast Guard ken sabali pay a barko manipod kadagiti baybay a kabangibang ti Scarborough Shoal.
Saanen nga indetalye pay ti nasao a media ti kanayunan nga impormasion maipapan iti panagbombada iti barko ti Pilipinas.
Iti sabali a bangir, manamnama nga ideploy ti Philippine Air Force ti baro a naalada a mobile surveillance radar system idiay West Philippine Sea.
Ti TPS-P14ME mobile surveillance radar ket paset ti P5.5 billion a defense contract ti Pilipinas iti Japan.
Sigun kenni Defense Secretary Gilberto Teodoro Jr., agserbi daytoy kas “domain awareness” iti masakupan a lugar ti Pilipinas partikular iti West Philippin Sea.
Ti nasao a radar system ket mabalin a maiyakar iti aniaman a paset ti Pilipinas kasta met idiay West Philippine Sea nu sadinno mabalin a maduktalanna dagiti eroplano ken barko a sumsumrek iti teritorio ti Pilipinas.
Sigun met kenni Air Force spokesperson Colonel Ma. Consuelo Castillo, posible a maideploy ti nasao a banag iti nasao a baybay tapno agserbi kas plataporma.
Agserbi pay ti nasao a banag a mangmintinir ti kinasayaat wenno kinarisgu ti tangatang kaspangarigan adda ti panagpangta iti maysa a lugar.
