Inawat ti Philippine Navy ita nga aldaw ti baro a corvette manipud South Korea a maipanagan iti maysa a Filipino revolutionary general, sigun iti Department of National Defense (DND).
Iti statement ti nasao a departamento, kinuna ti DND nga indauluan ni Defense Secretary Gilberto Teodoro Jr. ti seremonia ti isasangpet ti baro a corvette para iti masanguanan a BRP Miguel Malvar iti Naval Operating Base sadiay Subic, Zambales.
Agrukod ti barko iti 118.4 meters ken 14.9 meters ti kalawan ken addaan daytoy ti anti-ship missiles, maysa a vertical launching system, ken aktibo nga “electronically scanned array.”
Daytoy ket paset ti P28 bilion a kontrata a napirmaan iti nagbaetan ti Department of National Defense (DND) ken Hyundai Heavy Industries idi Disiembre 2021.
Pinagyamanan met ni Teodoro ti Republic of Korea gapu iti suportada.
