BAGUIO CITY – Manamnama ti baro a langa ti Ibaloi Heritage Park inton sumaruno a tawen kagiddan ti panakarenovate daytoy iton sumaruno a bulan.
Sigun kenni City Parks and management office Head Atty. Rhenan Diwas, maipinpinalen ti bidding process daytoy tapno makapilida ti kontraktor a mangigem iti proyekto.
Dinakamatna a naaprobaran ti pondo daytoy a dumanon iti 78 million pesos manipud iti opisina ni Senator Robin Padilla babaen iti panangidalanda iti Department of Budget and Management.
Kinunana pay a naidownload daytoyen iti City Treasury Office.
Innayona a maiyulog inton Marso iti agdama a tawen ti Notice of Award daytoy.
Sigun pay kenni Diwas, nalpasen ti plano iti proyekto pakairamanan iti initial design daytoy babaen iti panakipatangda kadagiti engineers iti nagduduma nga opisina ken iti Onjon ni Ivadoy ken daduma pay ng Ibaloi architects.
Malaksid iti dayta, inlawlawagna nga dagiti nagserbi a karit dagitoy ket iti panagplano iti desinyo gapu ta nasken nga agreflect dagiti traditional values ti Ibaloy community.
Inlawlawagna a ti intero a parke ti mapapintas ken mapalawa nu sadino mapadakkel ti “avong” wenno ti nippa hut sadiay pakairaman ti stage.//Bombo Raz Pagoli
