Impablaak ti Commission on Elections (Comelec) idi kalman ti baro a langa ti balota a maaramat para iti 2025 national and local elections, nasapsapa ngem ti naituding a panagsubli ti panagimprentada ita nga aldaw.
Ti baro a langa ti balota ket maimatangan iti bukod a website ti Commission on Elections (Comelec).
Naglaon ti balota iti innem a pulo ket innem a senatorial candidates ken sangagasut ken limapulo ket innem a party-list group candidates, karaman dagiti agngayangay iti lokal para iti probinsia, munisipyu ken kongreso a distrito.
Naituding ita nga aldaw ti panagimprenta ti official ballots para iti 2025 elections.
Sinuspindir ti Commission on Elections (Comelec) ti panagimprenta kadagiti balota idi napalabas a lawas kasaruno ti panangipaulog ti Korte Suprema ti baro a temporary restraining orders kontra kadagiti sumagmamano a nadiskwalipikar a kayatna nga agngayangay.
Iti baet ti kinakurang ti oras a panagimprenta kadagiti official ballots, panggep ti nasao nga ahensia a mapataud ti 1.5 milion a balota iti tunggal aldaw.
Dinutukan metten iti Commission on Elections ti National Printing Office (NPO) tapno maipasigurado a nasayaat, “satisfactory,” ken “timely” ti panagkumpleto iti panagimprenta ti official ballots.
Numan pay naitantan ti panagimprenta, impasigurado ni Comelec Chairman George Garcia a maituloy ti eleksion iti agdama a tawen inton Mayo a dose.
