Manamnama nga ag-operate intun umay a lawas ti baro a modelo ti Taxi iti La Trinidad, Benguet.
Iti panakiuman ti Bombo Radyo kenni Sandy Sanoy, Board of director ti maysa a kooperatiba ti transport group iti Munisipio ti La trinidad, kinunana a maileppas laeng ti sealing dagiti lugan.
Kalpasan daytoy, maituding ti launching tapno maiparang iti publiko sakbay nga opisial a maaramat.
Iti agdama, addan ti 46 a units ti nasao Taxi para iti phase 1 bayat a sumaruno metten ti 34 a units iti Phase 2.
Sigun kenni Sanoy, gray ti napagnunumuan dagitoy a pintura agsipudta maiparit ti White kas maibasar iti resolution a pinirmaan dagitoy.
Inlawlawagna a proyekto paylaeng daytoy idi 2017 no sadino, panggepda a mabawasan dagiti agop-operate a colorum a garage.
Inyunay-unay ni Sanoy a saan a mangitunda dagiti Taxi ti trapiko agsipudta, mabawasan ti colorum a garage iti Munisipio ti La Trinidad.
Kabayatanna, saan a karaman ti siudad ti Baguio iti prangkisa dagitoy.
Gapu iti dayta, awan ti mailugan a pasahero nga agturong iti siudad ti Baguio.
Nupay kasta, mabalin a dumalyasat dagitoy iti siudad nu adda ti pasaheroda nga agturong iti Munisipio ti Tuba, Itogon ken dadduma pay a lugar iti probinsya ti Benguet.//Bombo Noveh Organo
