BAGUIO CITY – Ipalpalagip manen ti Securities and Exchange Commission (SEC)- Baguio ti panagridam ti publiko kontra kadagiti manangallilaw nga scammers a mangbikbiktima kadagiti inidbidual a kayatna a sumrek iti negosio.
Iti panakiyuman ti Bombo Radyo kenni Helen Veryan Valdez, Information Officer ti SEC-Baguio Extension Office; imbinglayna nga ado ita dagiti nalaka a maaw-awis iti ididiaya dagiti scammers a negosio a saan met a rehistrado iti SEC.
Imbinglayna nga ado ti modus dagiti scammers tapno mangbiktima kadagiti umasideg kadakuada kas iti PYRAMIDING wenno REFFERAL Scam a maitunos metlaeng iti networking no sadino kumita ti maysa nga indibidual babaen iti maallukoyna nga agbalin a miyembro iti maysa nga entity.
Nagraira met itan ti online scams, PAALAGA scams no sadino maidiaya kadagiti biktima ti agtaraken kadagiti dingwen ngem awan ti pudno a pagtaraknan dagitoy; ken adda pay dagiti gasoline stations a maar-aramat iti nasao nga iligal nga aramid.
Gapu kadagitoy nga insidente, imbalakad ni Valdez a no adda mangidiaya iti investment ket biruken ti lisensiya dagitoy ken ti kompanya a mangpaneknek a lehitimoda nga agala iti investments.
Kasapulan met a nakarehistro a broker wenno agents dagiti mangididiaya iti negosio wenno investments.
