BAGUIO CITY – Agtultuloy ti nainget a panangbantay dagiti pulis kadagiti border checkpoints ti Baguio ken ti panangsukimatda kadagiti dokumento dagiti sumsumrek iti siudad.
Iti panakiuman ti Bombo Radyo Baguio, impannakkel ni PCol. Glenn Lonogan, City Director ti Baguio City Police Office a nagresulta ti nasao nga aksion iti panaka-impound ti innem a lugan a naaramat iti colorum nga operasyon iti laeng bulan ti Agosto.
Sigun kenkuana, modus ita ti colorum nga operasyon ket saanen a van dagiti maar-aramat ngem ketdi, dagiti SUV ken kotse.
Kinunana pay a nakasuan metten dagiti 14 nga indibidual a natiliw a nagaramat ti peke a dokumento iti panagturong dagitoy ditoy siudad.
Innayonna a nasurok metten iti 700 dagiti indibidual a napasubli ken saan a napalubusan a makastrek iti siudad gapu iti panakapaay dagitoy a mangipakita iti kompleto a dokumento.
Sigun pay kenni Col. Lonogan, kanayon ti panangiyulit-ulitna kadagiti personnel ti BCPO nga agbambantay kadagiti border checkpoints ti siudad a dagitoy ti first line of defense ti Baguio kontra iti COVID-19 isut gapuna a kasapulan nga irtenganda a kanayon ti panagbantay kadagiti borders.
