Patien ni Baguio City Mayor Benjamin Magalong a dakkel ti maaramidan dagiti baro a nabutosan a konsehal iti siudad ti Baguio.
Iti interview ti Bombo Radyo kenkuana, kinunana a saan a mapagduaduaan ti mabalin nga aramidenda iti konseho.
Patienna nga addaan dagitoy ti critical thinking ability a maaramatda iti panangaramid ti gakat, napnuan ti pigsa, natured, saan nga “extortionist,” ken saan nga agtatakaw.
Impaganetgetna a makaaramidda iti dakkel a panagbalbaliw para iti siudad ti Baguio.
Kabayatanna, maragsakan ni Magalong iti naawat ti siudad a 2025 Bloomberg Philanthropies Awards for Global Tobacco Control bayat ti World Conference on Tobacco Control a naangay idi Hunio 23 idiay Dublin, Ireland.
Sigun kenkuana, ti Baguio laeng ti kakaisuna a siudad kadagiti innem a recipients a nakaawat ti pammabigbig.
