Imbutaktak ti maysa a mammanday-linteg ti kanayonan a nagan nga umasping kadagiti grocery items a mapapati a mainaig iti saan a nasayaat a pannakaaramat ti P500 milion a confidential funds babaen ti Office of the Vice President (OVP) ni Vice President Sara Duterte.
Dinakamat ni House Deputy Majority Leader Paolo Ortega V ti baro a listaan kas “Team Grocery” a nakairamanan dagiti nagan a kas kada Beverly Claire Pampano, Mico Harina, Patty Ting, Ralph Josh Bacon, ken Sala Casim.
Sigun kenni Ortega, saan a nagparang iti official birth, marriage, wenno death records dagiti nasao a nagan iti Philippine Statistics Authority.
Kinuwestunar ni Ortega ti napanan ti pondo nu saan dagitoy a pudno a tao.
Idi napalabas a lawas, imbutaktak metlaeng ni Ortega ti nagan dagiti “recipients” wenno nakaawat ti pondo iti sidong ti “moniker” a “Team Amoy Asim,” pakairamanan ti Amoy Liu,” “Fernand Amuy,” ken “Joug De Asim.”
Immuna metlaeng nga imbutaktakna ti kanayunan a “recipients” wenno nakaawat ti kuarta iti nagan ti “Jay Kamote,” “Miggy Mango,” “Dongong Alcala,” “Dodong Bina,” “Dodong Bunal,” “Dodong Darong,” ken “Dodong S. Barok.”
Iti agdama, awan pay ti komento ti opisina ti Vice President.
