BAGUIO CITY – Inwaragawag ni Benguet Governor Melchor Diclas a saan a mapalubusan a makaawid iti babbalayda sadiay Benguet dagiti returning OFWs ken locally stranded individuals (LSIs) a naipasidong iti swab testing para iti COVID-19 agingga a saan a nairuar ti resulta dagitoy.
Sigun kenkuana, resulta daytoy ti obserbasyon nga adda dagiti kaso no sadino, nagpositibo iti COVID-19 ti pasyente idi nakasangpeten sadiay Benguet iti baet a naipasidong daytoy iti COVID test sadiay Manila.
Inlawlawagna a ti makitkitada a rason iti daytoy ket ti saan a panangkompleto ti pasyente iti mandatory 14-day quarantine sadiay Manila.
Gapu iti daytoy, impettengna a kayatda nga amin a returning OFWs nga agawid sadiay Benguet ket leppasenda ti mandatory 14-day quarantine sadiay Manila.
Makiddaw metlaeng ti nasao a banag kadagiti LSIs iti ruar ti Benguet sakbay dagitoy nga agawid iti probinsia.
Inyunay-unay ni Gov. Diclas a mapalubusan laeng dagiti retuning OFWs ken LSIs a makaawid iti babbalayda no rumwar ti resulta a negatibo dagitoy iti COVID-19.
Maipalagip nga agserserbi ti Benguet Training Center sadiay Wangal, La Trinidad kas triage center ken temporaryo a quarantine facility dagiti LSIs ken returning OFWs malaksid kadagiti municipal quarantine facilities ken iti Teachers Camp iti Baguio City nga agserserbi a triage area dagiti returning OFWs ti Baguio City, Benguet ken Mountain Province.
