BAGUIO CITY – Nangipaulog ti provincial government ti Kalinga ti naing-inget a pagalagadan kasaruno ti panakaipasidong ti probinsia iti Modified General Community Quarantine (MGCQ).
Nailanad iti Executive Order 2021-29 a mapalubosan ti dine-in services kadagiti food establishement ngem limitado laeng daytoy iti 20% capacity ken limitado laeng iti 50% capacity ti outdoor dine-in services.
Napabulosan metlaeng ti operasyon dagiti personal care services ngem limitado laeng iti 30% ti venue seating capacity.
Mabalin latta ti panakaipatungpal ti taripnong kas ti meetings, incentive, convention ken exhibition ngem limitado laeng daytoy iti 50% capacity.
Agtalinaed a maiparit paylaeng ti indoor sports, leisure resort ken non-essential mass gathering agingga iti tapos ti agdama a bulan.
Maipalubos ti inter-zonal ken intra-zonal travel ngem kasapulan a mangiparang ti negatibo a resulta ti RT-PCR Test dagiti agtawen iti 18 agpababa ken 65 agpangato a naala iti uneg ti 72 nga oras.
Mabalin nga iparangda ti vaccination card kas pamaneknek a nabakunaanda kontra COVID-19 sakbay a makabiahe dagitoy.
Inlawlawag ti opisina ti gobernador a naadaptar dagiti sumagmamano a pagaladan tapno malapdan ti iseserrek ti Delta variant ti COVID-19 sadiay Kalinga.
