BAGUIO CITY – Mailukat manen iti kabiitan a panawen ti night market sadiay Harisson Road ditoy siudad ti Baguio apaman a maaprobaran dagiti plano nga insagana dagiti otoridad para iti naur-urnos nga operasion daytoy.
Maipalagip a dagus a naipasardeng ti operasion ti night market kalpasan ti panaglukat daytoy idi December 1 gapu iti parikot iti crowd control.
Iti interbyu ti Bombo Radyo Baguio, kinuna ni Market Superintendent Fernando Ragma Jr. nga adda dagiti plano para iti panaglukat manen ti night market.
Kinunana a karaman iti daytoy ti panakaipatungpal ti control mechanism kadagiti umuneg ken rumuar iti night market.
Sigun kenkuana, 50 agingga 150 laeng nga indibidual ti mapalubusan nga umuneg iti night market ken no adda ti rumuar ket adda manen ti mapalubusan a sumrek.
Maiyakar met dagiti food stalls iti deppaar ti Jadewell Parking ken magudua iti dua ti lugar.
Mailatang ti maysa a linya kadagiti paglakuan ti taraon bayat a ti maysa a linya ti agserbi a ‘dining area’.
Nupay kasta, kinuna ni Ragma a no mabalin wenno posible ket para iti ‘take-out’ dagiti magatang a taraon.
Innayonna pay a mailukat manen ti night market ngem no adda manen dagiti mapasamak a parikot ket dagus daytoy a mairikep.
