Kinablaawan ni Mayor Benjamin Magalong ti siudad ti Baguio kagiddan ti panakarambak ti maika-115 founding anniversary daytoy.
Sigun kenni Magalong, ti nasao a selebrasyon ket mangiparparangarang iti nagbalin a “dynamic evolution” iti siudad ti Baguio babaen iti tulong ti amin nga umili.
Iti nagbalin a panagbitla ni Magalong iti State of the City Address daytoy, kinunana nga iti panakagun-od ti vision ti siudad ket kasapulan dagiti components kas iti stability, resiliency ken innovation.
Impakaamona a kalpasan ti walo a bulan a koordinasyon dagitoy iti nagduduma nga urban sektors kasta met kadagiti babbarangays ket naaramidda ti baro a vision iti siudad para inton tawen 2043 a “Livable, inclusive and creative Baguio.”
Iti livability, daytoy ket maipapan iti panangtagiragsak dagiti umili iti dekalidad a panagbiyag bayat nga iti inclusivity ket ti panakaipaay iti patas nga oportunidad kadagiti amin a residente iti siudad ken ti innovation ket ti panagbalin ti Baguio kas hub wenno sentro dagiti nagduduma a creativity dagiti umili a magipakpakita iti kultura ti rehiyon Cordillera.
Impeksa ni Magalong a ti baro a vision ti Baguio ket para iti pananglapped iti posible a panakadadael ti aglawlaw inton umay a tawtawen.
Innayonna nga iti nasao a vision, daytoy ket nakabasar iti 7-Point core agenda a buklen ti Environment, Land Use and Energy; Climate and Disaster Resilience; Urban Regeneration; Empowerig the Youth; Economic Recovery and Development; Smart City Management ken Good Governance.
Kabayatanna, mangnamnama daytoy nga agtultuloy ti kooperasyon dagiti umili ken dagiti nagduduma a maseknan tapno magun-od ti livable, inclusive, ken creative Baguio.//M