BAGUIO CITY – Kabaelan dagiti personnel ti COMELEC-Baguio a mangakomodar kadagiti kliyente nga agturong iti opisinada iti baet ti kaudian a pammilin a panakailaylayon ti operasyon dagitoy para iti voter’s registration.
Iti interview ti Bombo Radyo Baguio, kinuna ni City Election Officer Atty. John Paul Martin a mangrugi inton Lunes, Agosto 23 ket aglukat dagiti opisina ti komisyon iti alas-otso ti agsapa agingga iti alas-siete ti rabii manipud Lunes agingga Biyernes bayat nga aglukatda iti alas-otso ti agsapa agingga alas-singko ti malem tunggal Sabado ken holidays.
Nupay kasta, dinakamatna a pakaseknanda ti kiddaw ni Mayor Benjamin Magalong a no mabalin ket 30% laeng ti workforce ti agreport iti mismo nga opisinada gaputa adda latta ti stress factor ken iyal-alikakada ti salun-at ken kinatalged dagiti personnel ti COMELEC-Baguio.
Sigun kenkuana, agtungtungpalda met iti nasao a kiddaw isut gapuna a nagudwa ti siyam a personnel ti opisinada.
Iti baet daytoy, kinunana a kabaelanda latta nga akomodaren dagiti kliyenteda nangruna ta iti innaldaw a datus dagitoy ket dumandanon iti 170 agingga 190 ti innaldaw a maipaparehistro dagitoy.
Innayonna a no mailaylayon ti innaldaw a panaglukatda ket posible a dumanon iti nasurok 200 ti akomodaren dagitoy.
Dinakamat pay ni Atty. Martin nga inton sumaruno a bulan ti Setyembre a maudi a bulan ti panagparehistro para iti masungad nga eleksion ket umakarda iti Baguio Convention Center tapnu maakomodar amin nga agbalin a kliyente dagitoy.
