BAGUIO CITY – Nakemmeg ti maysa a baro kalpasan a natiliwan nga adda ti imetna a marijuana kabayatan ti panagsigarilyona iti asideg ti swimming pool area ti Baguio City National High School iti paset ti Burnham Park, siudad ti Baguio idi kalman.
Nabigbig daytoy a ni Salman Talib Lacsaman, 24-anyos, awanan trabaho ken residente ti Campo Filipino, Baguio City.
Maibasar iti blotter ti pulisya, nangisayangkat dagiti personnel ti BCPO-Station 5 iti anti-smoking operation iti nasao a lugar ken sadiay a naaktuwanda ti panagsigsigarilyo ni Lacsaman.
Sinitar dagiti pulis ni Lacsaman ngem maysa kadagiti pulis ti nakakita nga adda ti intinnag ti baro a maysa a sachet iti karuruutan.
Sinukimatda ti nasao a banag ken sadiay a naduktalan a marijuana ti intinnag ni Lacsaman.
Ginandat pay ti nasao a lalaki a tumaray ngem nakemmeg metlaeng daytoy.
Nakumpiskar metlaeng kenkuana ti maysa a pakete ti maatap a marijuana.
Sumangsango ita ni Lacsaman iti kaso a panaglabsing iti RA 9165 wenno Comprehensive Dangerous Drugs Act of 2002.
