Impakaammo ni Bayan Chairperson Teddy Casiño nga isagsagana ti Progressive and civil society groups ti pannakaipila ti baro nga impeachment complaint kontra kenni Vice President Sara Duterte.
Maipila daytoy iti kanito nga agpatingga ti one-year ban inton Pebrero 2026.
Sigun pay kenni Casiño, karaman pay laeng kadagiti batayan ti impeachment complaint ti maipagarup a “betrayal of public trust”.
Mainaig daytoy iti maatap a saan nga umno a pannakaaramat ti confidential funds.
Innayon ni Casiño a posible a manayunan paylaeng dagiti reklamo nga ipilada kontra kenni VP Duterte.
Maipalagip a kinuna ti Supreme Court a ti rason iti panangideklara a null and void dagiti immuna nga articles of impeachment ni Duterte ket ti panaglabsing iti one-year ban ti multiple complaints ken due process requirements.
Impetteng ti Korte nga aniaman a sumaruno nga impeachment complaint ket mabalin laeng a maipila mangrugi iti Pebrero 6, 2026.
