BAGUIO CITY- Maiyawiden sadiay Bicol Region ti bagi ti baro a pimmusay kalpasan a nagaburan daytoy iti daga a karga ti mismo a dump truck a pagserserbianna kas truck helper kalpasan a naaksidente dagitoy sadiay Suello Village, siudad ti Baguio idi agsapa.
Nabigbig daytoy a ni Marlon Llabres, 22-anyos, truck helper, tubo ti Bicol ken residente ti Puguis, La Trinidad, Benguet.
Iti panakiyuman ti Bombo Radyo kenni PCI Oliver Panabang, dadaulo ti Traffic Enforcement Unit ti Baguio City Police Office, nagtaud ti nasao a trak a nagkarga ti daga sadiay Marcos Highway ken pasalog iti kalsada idi naaddaan ti loose break.
Ginandat ti driver a ni Novie Romero, 34-anyos, tubo ti Apayao ken residente ti Puguis, La Trinidad nga isadsad ti nasao a trak idi igid ti kalsada ngem nangitunda laeng daytoy iti panakatumba ti lugan.
Kinuna ni Panabang a naibarsak paruar iti trak ti helper babaen iti sango a sarming ngem sadiay met nga iti panakatumba ti trak ket naigabor ti karga daytoy a daga iti biktima.
Dinakamatna a kinali pay dagiti nagresponde a grupo ti nasao a biktima manipud iti daga bayat a nagasgas laeng ti driver a nakaruar metten manipud iti pagagasan.
