BAGUIO CITY – Naituding nga iyemplementar ti lokal a gobyerno ti La Trinidad, Benguet ti narebisa a revenue code ti munisipyo ita a tawen 2018.
Immunan a kiniddaw ti liga dagiti asosasyon iti La Trinidad Vegetable Trading Post babaen iti suratda iti lokal a gobyerno ti panakaitantan ti implementasyon ti revised Revenue Code of 2017 ti La Trinidad ken ti panakaipatungpal pay ti dayalogo.
Naudi a narebisa ti Revenue Code ti La Trinidad, 12 a tawen ti napalabas bayat a naaprobaran ti revised Revenue Code of 2017 ti La Trinidad idi July 4, 2017.
Sagudayen ti linteg a tunggal lima a tawen ket marebisa dagiti revenue codes dagiti lokal a gobyerno.
Sigun met kenni Mayor Romeo Salda, ituloyda ti implementasyon ti baro a revenue code kagiddan ti information dissemination campaign kadagiti negosyante sadiay.
Naamuan a nagsurat ti Commission on Audit iti lokal a gobyerno ti La Trinidad ken ditoy nga ipalpalagipda manen ti panakaimplementar ti revised Revenue Code ti munisipyo tapnu maipangato ti mapastrekanda para metlaeng iti pagsayaatan dagiti umili sadiay.
Nailanad iti Revenue Code idi 2005 a P8,514 ti bayadan ti maysa a vegetable dealer para iti 2017 ken daytoy ket para iti P600 a mayor’s permit; P200 a business establishment fee; P100 a sanitary fee; P2,500 a garbage fee; P30 a zoning fee ken P200 nga occupation tax.
Nailanad met iti revised Revenue Code of 2017 a ti bayadan ti maysa a vegetable dealer ket P13,701 ken daytoy ket para iti P7,986 a license fees ken P5,715 a regulatory fees a bukbuklen ti P2,000 a mayor’s permit; P500 a business establishment fee; P200 a sanitary fee; P2,750 a garbage fee; P15 a business plate; P200 nga occupational tax ken P50 a secretary’s fee.
Naangay ti dayalogo iti nagbaetan dagiti opisyal ti liga ken dagiti opisyal ti munisipyo idi December 29, 2017 ken ditoy a naksayan ti babayadan ti vegetable sector ken nagbalin laengen a P10,237 ti babayadan dagitoy.
