BAGUIO CITY–Kinondenar ti Department of Trade and Industry-Cordillera ti waragawag ti nasional a gobierno nga iligal ti mapaspasamak a Barter Sytem ditoy pagilian.
Sigun kenni DTI-CAR Regional Director Myrna Pablo, agbalin laeng nga iligal ti mapaspasamak a barter no abusuen daytoy dagiti makipaspaset iti sistema ken no mapagbalin daytoy a negosyo.
Maipalagip nga inwaragawag ni DTI Secretary Ramon Lopez nga iligal ti sistema a Barter nga iti agdama ket nalatak ditoy pagilian.
Nupay kasta, impetteng ni Pablo a maysa laeng ti nasao a sistema a mangipakita iti napintas a wagas dagiti Pilipino a manglaban iti krisis a mapaspasaran iti sanglubongan.
Innayuna a nasken laeng ti naing-inget a panagannad dagiti masekna nangruna kadagiti kagawaan a maisuksukat iti sistema.
Kasapulan a kitaen no kaledad dagiti materyales ken kagawaan a maisuksukat iti barter ken kangrunaan no dagitoy ket nadis-infect kas panangliklik iti panagwaras ti COVID-19.
