Manarimaan ti panangsukimat ti opisina iti Good Governance Basketball League iti napasamak a panagdidinnangran dagiti basketball players iti District 2 ken District 20 kabayatan ti ay-ayam dagitoy idiay Barangay Scout Barrio, Baguio City itay laeng nabiit.
Iti pannakiuman iti Bombo Radyo kenni Christian Villareal, Commissioner iti Good Governance Basketball League, kinunana a nagdidinnanog dagiti players gapu iti saanda a nagkikinnaawatan kabayatan ti ay-ayam dagitoy.
Sigun kenkuana, imbitaranda dagiti nairaman kasta met dagiti coach tapno pagsaritaan ti insidente a napasamak.
Innayon ti nasao nga opisial a nakalanad iti house rules iti Good Governance Alliance a gastusanda ti panagpaagas dagiti naiturong iti ospital.
Iti agdama, maur-uray paylaeng ti resulta iti nadangran a kameng iti Public Order and Safety Division a naganawa iti nasao nga insidente.
Kabayatanna, inlawlawag ni Villareal a kangrunaan a trabaho dagiti referees ti panaganawa isu’t gapuna a manamnama a maimbitiran metlaeng dagitoy iti maangay a taripnong.
Kidkiddawen met ni Villareal ti atensyon dagiti district leaders ken coaches tapno palagipanda dagiti players dagitoy seknan iti tema ti liga a panagkaykaysa.
Impeksa ti nasao nga opisial nga ituloyda ti nasao a liga, saan a gapu iti premyo nu diket ti panangbukel ti camaraderie ken sportsmanship.
Manamnama met ti panakipatumpal ti panagtataripnong dagiti coaches ken district leaders kasta met a marepaso dagiti dadduma a pagalagadan iti nasao a liga.
Iti agdama, saan pay a maipablaak ti schedule para iti liga tapno mapaayaban pay dagiti maseknan.
Kasta metten tapno agkikinnaawatanda iti panggep ti nasao a liga ken maliklikan ti kapada nga insidente.//mp4
