BAGUIO CITY– Namnamaen ti City Tourism Office a bassit paylaeng ti bilang dagiti turista nga akomodaren ti siudad ti Baguio apaman a pormal a mailukat ti turismo iti Ilocos Region inton sumaruno a lawas.
Iti interview ti Bombo Radyo kenni City Tourism Officer Aloysius Mapalo, imbinglayna a gapu daytoy iti saan pay a panakaipalubos iti operasion dagiti parapubliko a lugan nga adaan ruta kadagiti kabangibang a rehion ti siudad.
Gapu iti daytoy, kinunana nga ikagkagumaan ti lokal a gobierno ti makipatang iti Department of Transportation para iti posibilidad a panakaipalubos iti panagbiyahe dagiti parapubliko a bus ken van a pagluganan dagiti turista.
Kabayatana, nakikoordinaren ti nasao nga opisina kadagiti hotels ken restaurants ditoy lokalidad para iti akomodasion dagiti bisita.
Inyunay-unay met ni Mapalo a saanpay a mapalubosan ti walk-in application dagiti turista kasta met dagiti day-time tours tapno maipatalged ti proteksion ken seguridad ti publiko kontra iti COVID-19.
Kinuna pay ti opisial nga adalenda pay no mailukat para kadagiti turista ti Mines View Park a nakaplano para iti rehabilitasion daytoy.
Nainget met naibalakad kadagiti turista a saan a karaman iti iterinary dagitoy dagiti pagpasyaran iti ruar ti siudad kas nailanad iti probisyon ti katulagan a pinirmaan ni Mayor Benjamin Magalong ken dagiti dadduma pay a maseknan nga opisial.
(timek ni City Tourism Officer Aloysius Mapalo)
