Immasideg itan ti pakaibelbellengan dagiti basura nga agtataud iti Baguio City.
Iti panakiuman ti Bombo Radyo kenni Eugene Buyucan, dadaulo iti General Services Office-Baguio City, iti sanitary landfill facility idiay Urdaneta, Pangasinan ti pakaiturturungan itan dagiti basura manipod iti siudad iti Baguio.
Sigun kenni Buyucan, as-asideg daytoy ngem iti sigud a pagibelbellenganda kadagiti basura idiay Capas, Tarlac rason a manamnama met a maksayan ti magastos para iti daytoy.
Innayon ti opisyal nga halos mamindua a daras nga ad-adayo ti sanitary landfill idiay Capas, Tarlac manipod Baguio City nu idilig idiay Urdaneta, Pangasinan, banag a pagyamyamananna gapu metlaeng iti naballigi a bidding para iti daytoy.
Kagiddan dayta, impeksa ni Buyucan ti namnamana a saanen a maiparekep ti sanitary landfill idiay Urdaneta tapno saanen a kasapulan ti Baguio City ti sabali manen a pagibellengan kadagiti basura a mapapataud daytoy.
Maipalagip a kinasapulan ti Baguio City ti mangbirok iti sabali a pakaiturungan iti basura daytoy kasaruno ti impaiyulog ti Department of Environment and Natural Resources a pammilin a panagsara ti sanitary landfill idiay Capas,Tarlac.
Mainaig iti dayta, adda ti naipaay a supplememental fund a dumanon iti Php20million nga aramaten ti nadakamat nga opisina para iti panakaimanihar ti basura agingga inton Disyembre.
Adda metten ti insingasing dagitoy a pondo para inton umay a tawen a dumanon met iti Php190million.
Kabayatanna, dakkel ti posibilidad nga umado ti basura a mapataud iti Baguio City ita nga umadanin ti holiday season.//Bombo Rob Dominguez