BAGUIO CITY – Nagpalawag dagiti maseknan a negosyante kasaruno ti panakasarak dagiti basura dagitoy a naibelleng iti igid ti kalsada sadiay Longlong, Puguis, La Trinidad, Benguet.
Sigun kenni Mayor Romeo Salda, lima kadagiti negosyante a nakapatangda idi kalman ti nangaklon a basura dagitoy dagiti nasarakan a naibelleng iti nasao a masakupan ti munisipyo.
Kinunana a maysa laeng ditoy ti saan a nangaklon a basurada ti naibelleng iti nasao a disso.
Sigun kenkuana, inkalintegan dagiti negosyante nga adda ti garbage hauler dagitoy ken ti ammoda ket adda ti legal a pagbasbasuraan dagiti nasao nga agak-akop iti basurada.
Dinakamat ti mayor a napanda iti disso a nakasarakan kadagiti nasao a basura ken sadiay a napagtutungtungan ti panagtitinnulong dagitoy para iti panakadalus dagiti nasao a basura.
Naipaayan met iti lima nga aldaw wenno agingga inton Biyernes dagiti nasao a negosyante a mangsungbat iti surat nga immunan nga impatulod ti municipal government kadagitoy.
Naamuan a no saanda nga agtungpal iti napagsaritaanda ket mabalin a mamulta dagitoy babaen iti lokal a gobyerno ken ti Environmental Management Bureau.
Maipalagip a manipud iti Oktobre ti napalabas a tawen ket nasarakan dagiti ubak dagiti nateng, construction materials ken coconut husk a naibelleng sadiay Longlong.
