Agserserbi kas rason dagiti basura manipud iti kabangingabang a barangay, iti panag-overflow ti danum manipud iti kanal a mangituntunda ti panaglayos ti kalsada idiay February Road, Barangay Guisad Central, Baguio City.
Iti ekslusibo a pannakiuman ti Bombo Newsteam kenni Marion Bondad, Barangay Chairman ti nasao a barangay, inyakarda ti grill iti kanal nga adda iti masakupanda a Guisad Central sadiay kanal ti Guisad Surong tapno adda ti mangtrap kadagiti basura ken saanen a malayos ti nasao a kalsada iti masakupanda.
Ti panaglayos iti nasao a kalsada ket naipablaak pay iti social media no sadino kinuna ti uploader a nabayagen ti nasao a parikut.
Inlawlawag met ti kapitan a tunggal napigsa ti bayakabak ti tudo ket talaga nga aglayos idiay no sadino daldalusan met dagitoy apaman a mamonitorda a nalayos ti kalsada.
Nupay kasta, gapu iti basura nga agtataod idiay Barangay Guisad Surong, maulit-ulit latta ti panaglayos sadiay.
Innayon pay daytoy a ti kanal ket pagay-ayusan metlaeng ti danum nga agtataud manipud iti kabangibang a barangay malaksid iti Barangay Guisad Surong.
Impeksa met ti opisyal a nakatungtongna metten dagiti Barangay Officials panggep iti pannakaiyakar ti grills iti masakupanda no sadino naiyakar metten dagitoy itay nabiit kalpasan iti naipatungpal a nagsina a clearing operation kadua ti City Engineering Office (CEO).
Impeksa met ti kapitan nga idi paylaeng a malaylayos ti nasao a kalsada gapu met ta idi ket napullatan ti inidoro.
Umap-apela mey daytoy kadagiti residente nangnangruna kadagiti adda iti kabingibang a barangay a liklikan dagitoy nga agibasura kadagiti kanal tapno saan a mapullatan dagiti kanal.
Kabayatanna, imbinglay met ni Virgilio Baterina, Barangay Treasurer iti nasao a barangay a namin-aduna metten a nilinlinisan daytoy nu sadino tunggal agdalosda, basura ti kanayun a maikatna. // via Bombo Noveh Organo