Pinagyamanan dagiti pito a napagasatan a napili a Lucky Summer Visitors of Baguio City dagiti mangbukbukel iti Baguio Correspondents and Broadcaster Club gapu iti naipaay kadakuda a red carpet treatment iti las-od ti uppat nga aldaw manipud idi aldaw ti Huwebes Santo.
Saggaysa a nangipeksa ti panagyaman dagiti bisita kadagiti kameng ti media iti send off ceremony a naisayangkat idiay Camp Pepot Burnham Park kagiddan ti aldaw ti panagbiag wenno Easter Sunday.
Immuna a naipasyar dagiti pito a bisita kadagiti kangrunaan a pagpasyaran iti siudad ti Baguio ken probinsya ti Benguet a bukbuklen da Mea Bee Baling ken March Karen Ugdaman manipud Davao City, ken da James Soriano ken dagiti annakna a da Rezia Joy, Ryza Jane, John Reube, ken Sophia Marie a nagtaud manipud Negros Occidental.
Dagiti pagpasayaran a binisita dagiti Lucky Summer Visitors ket ti Igorot Stone Kingdom, Mines View Park, Botanical Garden, Skyranch, Tam-awan Village, Wright Park, Polig Farm, Strawberry Farm, Beacon Hill ken dadduma pay.
Ti Lucky Summer Visitors of Baguio ket maysa nga annual project ti Baguio Correspondents and Broadcasters Club no sadino ti nasao a programa ket immuna a nairugi nasurok limapulo a tawenen ti napalabas nga addaan ti kangrunaan a panggep a makaguyoguy pay iti adu a bisita ken turista nga agturong ditoy Summer Capital of the Philippines.//Jordan
