Nagpalagip manen ti Baguio City Police Office iti publiko nangruna kadagiti maiparit nga alikamen ken kagawaan kadagiti sementeryo kagiddan iti umadani a pananglagip iti undas inton sumaruno a bulan.
Sigun kenni Police Major Harriet Bulcio, Station Commander iti Baguio City Police Office Station 1, iti nasurok siyam a sementeryo ditoy siudad iti Baguio, manamnama iti adu a bilang dagiti agturong kadagitoy nangruna iti Baguio City Public Cementery a sakop iti BCPO Station 1.
Imbinglayna nga idi napalabas a tawen, nasurok 30,000 ti nagturongs sadiay iti las-od ti tallo laeng nga aldaw no sadino sigun kenkuana ket manamnama iti kastoy a bilang wenno nasurok pay ita a tawen.
Nagballaag metlaengdaytoy iti publiko kadagiti kagawaan a maiyuneg iti sementeryo gapu pa iti dakkel ti bilang dagiti agturturong iti sementeryo, posible adda kadagitoy dagiti indibidual nga addaan iti saan nasayaat nga aramidda.
Kabayatanna, imbinglayna a maiparit pay laeng dagiti alikamen kadagiti sementeryo kas iti gardening tools gapu paylaeng ta maiparit iti agdalus manipud October 31 agingga November 2.
Maiparit metlaeng iti anyaman a kagawaan a mabalin a makadangran iti sabali kas iti bladed weapons ken paltog, kasta met a maiparit dagiti arak, gambling materials, nangruna dagiti flammable materials ken speakers.
Inlawlawag ni Bulcio nga apaman nga adda dagiti makitada kadagiti nadakamat a bambanag, dagos a makumpiskar dagitoy iti pay laeng gates dagiti sementeryo babaen kadagiti agbambantay a kapulisan ken volunteers.
Kabayatanna, impanamnama met ti kapulisan a maipaay ti seguridad kadagiti agturong a manglagip kadagiti minatayda babaen iti panangpasayaat iti panagbantay ken panagpatrol iti aglawlaw dagiti sementeryo.
Kinidawna met iti publiko ti pannakikooperarda kadagiti otoridad ken agtulnogda kadagiti pagannurutan tapno natalged ken natalna ti pananglagip iti Undas ita a tawem. //via Bombo Khey Reparip
