BAGUIO CITY – Ipampannakkel ni PCI Eddie Bagto, dadaulo ti BCPO – Station 1 ti panangbigbig ti Police Regional Office Cordillera (PROCOR) iti kuerpoda kas Best City Police Station.
Sigun kenkuana, iti naipatungpal a validation ket ti laeng BCPO – Station 1 ti nabigbig kas Best City Police Station iti rehion.
Impannakkelna a karaman kadagiti rason iti panakapili dagitoy ket dagiti nagduduma nga accomplishments wenno naaramidan ti Station 1 kas iti bassit a bilang dagiti kaso a nailista dagitoy kadagiti napalpalabas a kwarter ti agdama a tawen.
Innayonna a karaman pay ditoy ti dagus a panakaideklara dagiti 13 a barangay iti masakupanda kas drug-cleared barangays kagiddan ti implementasyon ti Oplan Tokhang, Oplan Taphang ken Oplan Double Barrel Reloaded.
Gapu iti daytoy, impanamnamana ti agtultuloy a panangipaayda iti napintas a serbisyo kadagiti umili ken ti pangipatungpalda kadagiti nagduduma nga programa ti pulisya.
