Puntirya ti City Disaster Risk Reduction and Management Office-Baguio nga ipaayan iti radio communication equipments dagiti amin a Barangay Disaster Risk Reduction and Management Committee iti siudad ti Baguio agingga inton umay a tawen.
Sigun kenni Engineer Charles Carame, opisyal manipod iti nadakamat nga opisina, rinugyandan idi Pebrero nga ipaayan dagiti babbarangay iti radio communication equipments nu sadino, posible nga uppat a pulo manipod iti 128 a barangay iti Baguio City ti maipaayan ita a tawen.
Inlawlawag ni Engr. Carame a tunggal panawen iti didigra wenno emerhesiya, saan a mabalin nga agdepende laeng kadagiti cellphone gapu ta mabalin nga mapukaw ti network service wenno internet.
Kagiddan dayta, impaganetgetna ti kinapateg ti panagaramat iti radio communication equipments nangruna kadagiti responders kas maysa a wagas tapno mapagtalinaed ti komunikasyon dagitoy iti panawen iti didigra.//Bombo Rob Dominguez
