BAGUIO CITY – Nakemmeg ti maysa a beautician gapu iti panagtakawna iti uneg ti maysa a supermart sadiay Campo Sioco, Baguio City idi kanikadua.
Nabigbig daytoy a ni Jeffrey Malati Ocampo, 29-anyos, baro, tubo ti Tacloban, Leyte ken residente iti Suello Village, Marcos Highway, Baguio City.
Naamuan a nakalibas ti dua pay a saan a nanigbig a kakadwa daytoy.
Maibasar iti report ti pulisya, nagala dagiti suspek kadagiti gagatangen manipud iti nasao a supermart.
Nupay kasta, saanda a binayadan dagiti nasao a grocery items nga aggatad ti nasurok P52,000.
Nakita met iti monitor ti CCTV camera a nakamuntar iti pagtagilakuan ti saan a panangbayad dagiti suspek kadagiti inalada a tagilako.
Gapu iti daytoy, kinomprontar ti gwardia dagiti tallo ngem naglibas ti dua bayat a nabati ni Ocampo a naipaima iti pulisya.
