BAGUIO CITY – Temporaryo a maksayan dagiti kama iti Baguio City Community Isolation Unit a maar-aramat iti panakataming dagiti COVID-19 positive iti Sto. Nino Hospital ditoy siudad ti Baguio.
Sigun kenni Dr. Willy Occidental, facility manager ti nasao nga ospital, maksayan iti 25 dagiti kama a maar-aramat iti pagagasan iti las-ud ti tallo nga aldaw.
Inlawlawagna a para daytoy iti panakaisimpa ken panakatarimaan ti pasdek tapno saan daytoy a mabasa kabayatan ti tudo.
Kinunana nga awan ti agbalin a parikot iti panakaurnos ti nasao a pasilidad agsipud ta ibaklay ti lokal a gobyerno ti amin a mabusbos iti daytoy.
Innayon pay ni Dr. Occidental nga iti agdama ket awan ti mapaspasaran dagitoy a parikot iti pannakaimanehar ti nasao a quarantine facility gapu iti agtultuloy a monitoring dagiti opisial ti lokal gobierno ti siudad.
