BAGUIO CITY – Kinumpirmar ni Benguet General Hospital Chief Dr. Miliarazon Dulay a napunnon (fully occupied) ti COVID ward dagitoy a pakatamtamingan dagiti pasyente ti COVID-19.
Iti interview ti Bombo Radyo Baguio, dinakamatna nga ado pay dagiti pasyente iti nasao a sakit ti nakapila ken agur-uray a maadmitar iti nasao a pagagasan.
Sigun kenkuana, 41 beds ti nailatang para kadagiti kumpirmado a kaso iti COVID-19 ngem maar-aramat ita dagitoy nangruna ta adda dagiti mapaspastrek a bantay met dagiti pasyente iti nasao a sakit.
Kinunana a dagiti kritikal ken severe cases ket matamtaming iti pagagasan gaputta maiturturong dagiti moderate wenno awanan iti sintomas kadagiti quarantine ken isolation facilities ti ospital.
Dinakamatna pay nga iti kanito a kumaro ti sitwasyon dagiti agnanaed iti isolation ken quarantine facilities ket nalaklaka maiturong iti nasao nga ospital.
ni Benguet General Hospital Chief Dr. Miliarazon Dulay
Kabayatanna, panggep ti BeGH a nayunan ti ward dagitoy tapnu ad-adu pay ti maakseptar a pasyente iti COVID-19.
Kinuna ni Dr. Dulay a manamnama ti panakaisimpada iti non-covid ward ti ospital intun Mierkules, Abril 7, tapnu magpabalin a kanuyunan nga COVID-ward.
Malaksid iti dayta, kasapulanda met ti pannakagatang kadagiti kasapulan iti operasyon ti kanayunan nga COVID ward a naiyumanda metten iti opisina ti gobernador ti benguet ken iti DOh-COrdillera para iti kanayunana a pondo.
