BAGUIO CITY – Tuttutukan ken pappapintasen pay ti Team Lakay ti game plan para iti maikapat a panagsango iti cage da sigud a ONE Bantamweight World Champion Kevin Belingon ken agdama a ONE Bantamweight World Champion Bibiano Fernandes ti Brazil inton October 13 sadiay Tokyo, Japan.
Agserbi a co-main event iti second card ti ONE Century ti mapadpadaanan a rematch da Belingon ken Fernandes.
Iti panakiyuman ti Bombo Radyo Baguio, kinuna ni Belingon a siento porsiento ti kumpiyansana a maagawna manen ti titulo kenni Fernandes.
Nupay kasta, dinakamatna nga agannad latta daytoy iti uneg ti cage gaputa posible a maka-tsamba ti Brazilian fighter.
Innayon ti Igorot fighter nga iti napalabas a tallo a labanda kenni Fernandes ket nagbalinen a pamilyar kenkuana ken ammonan ti fighting style wenno dagiti garaw ken kalibre ti agdama a ONE Bantamweight World Champion.
Sigun pay kenkuana, tuttutukanda ti grappling gaputa ditoy a napigsa ni Fernandes.
Nabaelan ni Belingon a naagaw kenni Fernandes ti titulo kas ONE Bantamweight World Champion ngem iti umuna a panangidepensana iti daytoy ket nadiskwalipikar gapu iti maatap nga illegal strike iti likod ti ulo ni Fernandes.
Dagus met nga inbilin ni ONE CEO Chatri Sityodtong ti rematch ti dua a kampeon.
Kabayatanna, lumaban metlaeng iti ONE Century dagiti tallo pay a Team Lakay fighters a da Lito Adiwang, Honorio Banario ken Danny Kingad. (-with Bombo Jordan Tablac)
