BAGUIO CITY – Naipasidong iti Modified Enhanced Community Quarantine (MECQ) dagiti probinsia ti Benguet ken Apayao, epektibo ita nga aldaw, May 10 agingga inton May 23 ti agdama a tawen.
Maitunos daytoy iti Resolution No. 114-C nga impaulog ti Inter-Agency Task Force for the Management of Emerging Infectious Diseases idi kalman kas maibasar iti rekomendasyon ti Screening and Validation Committee ti task force.
Angayen met ni Benguet Governor Melchor Diclas ti Provincial IATF para iti maysa nga emergency meeting inton bigat para iti panakabukel dagiti pagalagadan a maipatungpal iti probinsia ken iti panakatalantan dagiti dadduma nga isyu.
Manamnama a makatulong ti baro a klasipikasyon iti panakakissay dagiti kaso ti COVID-19 iti probinsia.
Iti report ti Public Information Office ti Benguet, nailista ti probinsia ti panagngato iti kaso ti COVID-19 ken manaynayonan ti bilang dagiti matmatay gapu iti nasao a sakit.
Maibasar iti rekord, nailista sadiay Buguias ti kaubingan a pimmusay gapu iti COVID-19 iti Benguet babaen iti tallo anyos a babai idi napalabas a Biyernes, May 7.
Napunno metten ti bed capacity para kadagiti pasyente ti COVID-19 iti Benguet General Hospital a nakaiturongan dagiti makapaspasar ti nakaro ken kritikal a sintomas ti nasao a sakit.
