BAGUIO CITY — Nananatiling sarado ang Benguet–Nueva Vizcaya Road dahil sa road slip na dulot ng masamang panahon, ayon sa Department of Public Works and Highways (DPWH).
Pinayuhan ang mga motorista na dumaan sa Marlboro-Beckel Road o Labey-Lacamen Road bilang alternatibong ruta.
Samantala, bukas sa trapiko ang mga pangunahing kalsada patungong Baguio City, ngunit limitado sa mga magagaang sasakyan na may maximum na limang toneladang karga ang Kennon Road. Nananatili rin ang mga restriksyon sa pansamantalang Acrow Bridge sa Camp 2 at sa one-lane section malapit sa rock shed.
Pinayuhan ng DPWH ang mga drayber ng mabibigat na sasakyan na dumaan sa Marcos Highway o Asin-Nangalisan-San Pascual-La Union boundary road. Hinikayat din ang lahat ng motorista na maging mapagmatyag dahil sa banta ng pagbaha, pagguho ng lupa at bato, pagbagsak ng puno, at mahinang visibility dulot ng tuloy-tuloy na pag-ulan.
Ayon sa PAGASA, magpapatuloy ang maulap na panahon at paminsan-minsang pag-ulan sa Hilagang Luzon dahil sa umiiral na habagat.
