BAGUIO CITY – Sumangsango iti disqualification complaint ti bise gobernador ken kumankandidato iti kina-kongresista ti Benguet a ni Ericson “Tagel” Felipe gapu iti mapapati a panagaramatna iti government issued vehicle bayat ti panagkampanyana.
Maibasar iti petition nga impila ti pribado nga indibidual a ni Ralph Robin L. Tan idi May 2, 2025, maatap a nilabsing ni Felipe ti Section 68 ti Omnibus Election Code (OEC), partikular ti panagaramat iti government issued vehicle bayat ti panagkampanya.
Nakalanad pay iti reklamo a regular a nakaparada ti puraw a lugan nga adda tatakna a “FOR OFFICIAL USE ONLY” iti sanikua ni Felipe iti siudad ti Baguio.
Malaksid iti daytoy, mapapati pay a natapalan ti marking a “FOR OFFICIAL USE ONLY” iti magnetic sign a “Good Governance Benguet.”
Ti nasao a lugan ket maatap a nakarehistro iti Benguet Provincial Government kas maibasar iti certification manipud iti Provincial General Services Office.
Gapu iti daytoy, idagdagadag ti petitioner iti Commission on Elections a makanselar ti certificate of candidacy ni Felipe ken maideklara nga stray ballots ti botos daytoy.
Kabayatanna, maibasar iti opisial nga statement iti Partido Federal ng Pilipinas, kinunada a saan da pay a makaipaay iti komento agingga a saan da a naawat ti kopya ti nasao a disqualification complaint.
Kukuwestiyonaranda met ti pannakaipila ti reklamo, agsipudta sumagmamano nga aldaw laeng sakbay ti May 12, 2025 elections.
Impetteng pay ti nasao a partido a nakasagana ti legal team dagitoy a sumungbat iti amin a kaso kontra kadagiti kadidato dagitoy.
