Nakaawat ti positibo a komento ken feedback ti Tuba Municipal Police Station gapu iti agtultuloy a serbisyo nga ipapaayda iti publiko.
Sigun kenni Maril Bayating, Jr., makinkukua iti Riverview Resort idiay Asin Road, Tuba, Benguets, adadda a nagbalin a propesyonal ti kapulisan nu idilig idi. Innayonna a simmayaat metlaeng ti personal relationship dagitoy kadagiti kliyenteda ken iti publiko.
Innayon pay daytoy napagtalinaed ti kapulisan ti police visibility wenno panagrundada kasta metten ti panagturongda kadagiti nagduduma nga establisimiento tapno agpalagip, agbantay, ken mangipaay iti impormasyon tapno maaddan dagitoy iti naan-annay nga impormasyon seknan iti panangliklik iti nagduduma a krimen ken insidente.
Nakatulong met daytoy iti panagbaba ti krimen wenno insidente iti nasao a lugar.
Imbinglay metlang ni Bayating Jr, a dakkel ti tulong dagiti kapulisan iti panangpakalman kadagiti tattao nangnanguruna nu adda dagiti mapasamak a gulo.
Iti baet dayta, impeksa ni Bayating, Jr. nga adda latta dagiti naobserbaranna a kinakurang iti mobility para iti dagos a panagresponde kas iti kinakurang ti mobile patrol.
Iti sabali a bangir, agyamyaman met da Engr. Arvin Philup Go , Manager ti Sales and Marketing Department ti Goldrich Construction and Training ken Jackie Ekman, Human Resource Associate III ti nasao a kompanya iti kapulisan gapu iti tulonda iti panangsolbar iti napasamak a panagtakaw iti kompanya dagitoy.
Impetteng dagitoy a sipud pays iti damo, saanen a naawan ti kapulisan iti panangsolbar iti nasao a problema ken pannakaibalud dagiti responsable iti nasoa nga aramid.
Inlawlawag ni Engr. Go a nupay adda metlaeng ti private investigation nga insayangkatda, adadda a napapartak ti progreso ti kaso gapu iti intervention ken panagreport dagitoy iti kapulisan.
“Overall coordination is excellent, they’re professional, transparent and maasikaso” sigun kenni Ekman
“Walang masabi sa pag-aksyon at dedikasyon ng Tuba MPS, isang tawag lng umaaksyon agad” sigun met kenni Engineer Go.
Kagidan dayta, kinidaw met ni Engr. Go iti gobierno a maipaay dagiti nagduduma a kasapulan dagiti kapulisan kas kadagiti logistic wenno anyaman a maaramat iti komunikasyon para iti nasaysayaat ken naparpartak a panagresponde dagiti saan laeng nga idiay Tuba ngem kadagiti nagduduma metlaeng a lugar.
Agtultuloy met ti panangipaay dagiti kapulisan iti tulong kadagiti komunidad kas iti mantra ti Philippine National Police (PNP) a ” Bagong PNP para sa Bagong Pilipinas- Serbisyong Mabilis, Tapat at Nararamdaman”.