Kinablaawan ti agdama a US President a ni Joe Biden ni sigud ken sumaruno a US President Donald Trump iti panagballigi daytoy iti kalleppas a 2024 Presidential Elections.
Impadanon ni Biden ti kablaawna kenni Trump babaen iti maysa a phone call sigun kenni Steven Cheung, ti spokesperson ni Trump.
Kagiddan dayta, inimbitaran ni Biden ti sumaruno a presidente iti White House tapno masigurado ti naannayas a transisyon iti baet ti agdama ken ti sumangbay nga administrasyon.
Agparparang met a paunlakan ni Trump daytoy ngem iti agdama, awan pay ti naituding nga aldaw wenno oras ti panagkitada.
Maipalagip nga immunan a kinablaawan ni Kamala Harris ni Donald Trump iti panangabak daytoy babaen metlaeng iti phone call.
Mainaig iti dayta, impeksa ni Biden ti panangdayawna kenni Kamala Harris kalpasan ti concession speech ti bise presidente nu sadino, inladawanna daytoy kas tremendous partner ken public servant a napnoan iti integridad, tured, ken karakter.
Kabayatanna, manamnama met ti panagbitla ni Biden iti nation address ita a Hueves.
