BAGUIO CITY – Nangrugin ti panaka-pintura dagiti paset dagiti kangrunaan a kalsada ditoy siudad ti Baguio a nabigbig nga agserbi kas safety biking lanes kas paset ti Bike Lanes Project.
Babaen daytoy iti traffic and transport task force ti siudad.
Sigun kenni Mayor Benjamin Magalong, babaen iti kaadda ti natalged a linya iti kalsada para iti panagbisikleta ket maipaayan pateg ken konsiderasyon ti kinatalged dagiti agbisbisikleta kadagiti kalkalsada ti siudad.
Ti proyekto ket paset ti kampanya ti lokal a gobyerno a mapagbalin a 20-minute city ti Baguio, no sadino, agbalin a 20 a minutos ti travel time manipud ken paawid iti pagtaengan babaen iti panagpagna, panagbisikleta ken iti moderno a parapubliko a transportasyon.
Tarigagay ti proyekto a mapagbalin dagiti kalsada ti siudad kas community spaces a maka-akomodar iti amin a kita ti transportasyon.
Sakupen ti Phase 1 ti Bike Lanes Project dagiti napili a kalsada iti Central Business District ken Loakan Road bayat a ti sumaruno a phase ket mairaman a sakupenna dagiti urban streets ken major road arteries iti siudad.
Karaman iti maisingsingasing a bike lanes ti CBD Bike Loop partikular iti Justice Hall agingga iti Kalaw Street; ti BGH Rotunda agingga Panagbenga Park; ti Governor Pack Road agingga BGH Rotunda; ti Loakan-Apugan agingga Leonard Wood Road; ti Harisson Road agingga M. Roxas Street babaen iti Magsaysay Avenue-Bonifacio Street ken ti City Hall agingga Marcos Highway babaen iti Legarda Road.
