Pakabuklan a P148,848,794 a “compensation” wenno bayad ti naipaay kadagiti sumagmamano a biktima ti panagraut idiay Marawi idi 2017, sigun iti Marawi Compensation Board (MCB).
Kinuna ti opisial ti Marawi Compensation Board a naipaay ti “compensation” kadagiti benepisiario ti walo pulo ket innem a death claims kasta met ti tallo pulo ket dua nga structural ken personal property claims.
Nagyaman met dagiti nakaawat nupay nakalkaldaang ti napasamak nangruna dagiti naawanan ti paset ti pamilia.
Idi July 2023, linuktan ti Marawi Compensation Board (MCB) ti aplikasion dagiti “claims” a pakairamanan ti structural property, death, personal property claims ken dadduma pay.
Sigun kenni MCB chairperson Maisara Dandamun-Latiph, agserserbi ti Republic Act 11696 kas namnama para kadagiti naapektaran ti panag-atake idiay Marawi.
Idi Agosto idi napalabas a tawen, kinuna ni President Ferdinand “Bongbong” Marcos Jr. a pakabuklan a P1 billion ti nakalatang para kadagiti biktima ti Marawi Siege Victims Compensation Program iti naisingasing a 2024 national budget.
Kabayatanna, ti panangipila ti aplikasion para iti “compensation” ket agleppas agingga laeng inton July 4, 2024.
Maipalagip a ti panag-atake ket nangrugi idi May 2017 babaen ti Maute Group ken nagbayag daytoy ti sumagmamano a bulan nu sadinno, indeklara ni sigud a President Rodrigo Duterte ti pannakawayawaya ti siudad manipud iti grupo idi Oktubre tawen dos mil baente tres.
