BAGUIO CITY – Manaynayonan dagiti establishimento ditoy siudad ti Baguio nga agpaparehistro tapno maipaayan dagitoy ti Safety Seal.
Iti panakiuman ti Bombo Radyo Baguio kenni City Tourism Officer Alec Mapalo, imbinglayna a nasurok itan iti 350 nga establishimento ti nagparehistro a maipaayan ti Safety Seal .
Maipalagip a nailanad iti pagalagadan ti panakailukat manen ti siudad kadagiti turista a dagiti laeng accomodation establishments nga addaan ti Safety Seal ken nakapagrehistro iti Baguio VISITA ti mabalin a turongen dagiti bisita.
Babaen iti Safety Seal, maipaneknek a dimmalan dagiti establishimento iti inspeksion dagiti maseknan nga ahensia ken natalged dagitoy a turongen dagiti turista ken ti publiko.
Sigun kenni Mapalo, manipud nalukatan ti turismo ti siudad ket adon dagiti interesado nga agaplikar para iti Safety Seal gaputa tarigagayda ti maka-akomodar ti ad-ado pay a turista.
Immuna metten nga impanamnama ti Hotel and Restaurant Association of Baguio a nakasaganan dagiti stakeholders iti tourism industry ti siduad a mangakomodar kadagiti fully vaccinated a turista.
Babaen daytoy iti panakabakuna iti maikadua a dose ti dumanon 5,000 nga stakeholders ti tourism sector ti siudad iti tallo nga aldaw a panagbakuna kontra iti COVID-19.
Gapu iti daytoy ket addaanen ti naan-anay a proteksion dagiti personnel ti tourism sector ti siudad manipud iti COVID-19.
