BAGUIO CITY – Aw-awisen latta ti COMELEC-Baguio dagiti kayatda ti agbalin a botante ti siudad iti panagparehistroda iti opisina dagitoy.
Iti interview ti Bombo Radyo Baguio kenni City Election Officer Atty. John Paul Martin, kinunana a bumasbassit ita dagiti agturturong iti opisinada tapnu agparehisto.
Sigun kenkuana, kadawyan a nasurok 40 a kliyente ti as-asikasuenda iti innaldaw.
Innayonna a nasken a saan nga urayen dagiti kwalipikado nga agrehistro ti September 2021 sakbayda nga agparehistro.
Dinakamat ni Atty. Martin a mapattapatta nga 80 percent kadagiti nagpa-book iti online ti mangtungtungpal iti intuding dagitoy a panagturong iti opisinada tapnu agparehistro.
Kinunana a saan met a mabalin ti satellite registration gaputa awan iti siudad ti nakailista iti zero case ti COVID-19 a kas nailanad iti ikalkalikagum ti ahensia.
Iti baet daytoy, mangnamnamada nga iti kanito nga adda ti maaramid a bakuna kontra iti COVID-19 ket umado manen dagiti agparehistro iti opisinada.
Kabayatanna, naipasidong iti Election Registration Board hearing kadagiti 1,090 a nagparehistro ditoy siudad iti entero a bulan ti Setyembre, no sadino, maaprobaran amin nga aplikasyon ti rehistrasyon no awan ti panagtubngar kadagitoy.
