CORDILLERA – Maob-obserbaran ti panagadu ti bilang dagiti agtutubo a mannalon iti rehion Cordillera kas maibasar iti datos ti Deparment of Agriculture-Cordillera.
Iti pannakiuman ti Bombo Radyo kenni Jovelyn Valenciano -Information Officer II iti Deparment of Agriculture-Cordillera, kinunana a dagiti agtutubo a mannalon ket agtawenda iti 18 agingga 30-anyos.
Sigun kenni Valenciano, immado ti bilang dagiti agtutubo gapu kadagiti nagduduma nga aktibidad nga ipatpatungpal ti nasao nga opisina a kas ti “Young farmers challenge.”
Ti “young farmers challenge” ket maysa a programa no sadino adda ti maawat dagiti winners a mabalin nga aramatenda kas initial capital para iti aniaman nga agriculture endeavor dagitoy.
Daytoy ket nationwide nga inisyatiba ti Deparment of Agriculture tapno mang-allukoy kadagiti ubbing a pasayaaten ken iyemplementar ti innovative agri-business ideas.
Kinuna ni Valenciano a saan a mailibak nga ado ti mas mangpilpili a sumrek wenno iti white collar jobs kas iti kurso a nurses ken dadduma pay no idilig kadagiti kurso nga adda pakainaiganna iti farming kas iti agriculture.
Daytoy ket gapu metlaeng ti notion wenno kapanunutan ti kadawyan a nagannak a negatibo ken kinakurang ti panakaawat panggep iti agriculture wenno panag-garden.
Nupay kasta saan met a maaw-awanan ti namnama ti nasao nga ahensya a mas umado pay dagiti young farmers iti rehion tapnu iti kasta ket agtultuloy ti kinasayaat ti agrikultura iti rehion.
Daytoy ket gaputa adda ti posibilidad a bumaba ti food production iti maysa a rehion no ag-decline ti bilang dagiti young farmers ken dagiti agrehistro a farmers iti maysa a rehion.//Bombo Noveh Organo
