Agtultuloy a ngumatngato ti bilang dagiti agtutubo nga agus-usar ti electric cigarette, iti baet ti sangapulo a tawen a bimmabaan ti panagusar iti tabako iti Pilipinas, sigun iti Department of Health idi kalaman.
Sigun kenni Armund Arguellas, Health Promotion Bureau representative ti Department of Health, ngimmato iti 110% ti bilang dagiti agtutubo nga agususar iti nasao a produkto iti las-ud ti uppat a tawen manipud iti sigud a 24.6% idi tawen 2019.
Maysa a kangrunaan a makagapu iti iyaadu iti bilang ti nalaka a paggatangan, no sadino 77.1% kadagiti agtutubo ti gimmatang kadagiti tiendaan, street vendors ken dadduma pay.
Kabayatanna, maibasar iti datos ti Global Youth Tobacco Survey (GYTS), 14% nga estudiante nga agtawen ti 13 angingga 15 ti kaaduan nga agususar iti e-cigarettes.
Gapu iti daytoy, panggep ti health department, partner agencies, ken non-government health organizations a pabassiten ti panagkasapulan ken suplay dagiti nasao a produkto ken papigsaenda dagiti regulasion kas iti panangingatoda iti vape taxes.
Malaksid iti dayta, panggep ti Department of Health a papigsaen ti panangiparit ti tobacco advertising, promotion, sponsorship ken mangipatawda ti naing-inget a panangiparit iti panangilako kadagiti produkto iti tabako kadagiti asideg a lugar iti pagadalan.
