![](https://img.bomboradyo.com/baguio/2021/01/anti-rabies-vaccine.jpg)
BAGUIO CITY – Nasuroken iti 50,000 mga aso ken pusa iti Baguio ti nabakunaan dagiti personnel ti City Veterinary and Agriculture Office (CVAO) kontra iti rabis iti uneg ti makatawen nga implementasyon ti anti-rabies vaccination ti lokal a gobyerno.
Sigun kenni City Veterinarian Dr. Brigit Piok, idi napalabas a tawen ket naragpatda ti 125 percent nga accomplishment iti implementasyon ti anti-rabies vaccination no idilig iti bilang dagiti aso ken pusa a nabakunaanda kontra iti rabis idi 2019.
Innayonna a nairtenganda met ti kampanya ti lokal a gobyerno kontra kadagiti walang nga aso a nagresulta iti panaka-impound ti nasurok 3,000 a walang nga aso ken pusa, malaksid pay iti panakakapon dagiti 559 ng aso ken pusa.
Kagiddan iti daytoy, inaprobaran ti lokal a konseho iti maudi ken pinal a panagbasa ti singasing nga ordinansa a mangisaksakad iti sumagmamano a panagamyendar iti Responsible Pet Ownership Ordinance ti Baguio, kas iti panakaikalikagum iti panakairehistro dagiti taraken ken ti panakaikabil ti micro-chips wenno dog tags kadagitoy.
Ag-epekton to ti naamyendaran iti Responsible Pet Ownership Ordinance iti kanito a pirmaan daytoy ni Mayor Benjamin Magalong.