BAGUIO CITY – Nasuroken iti 40,000 nga aso ken pusa iti siudad ti Baguio ti nabakunaan kontra iti rabis kas paset ti panangimplementar ti City Veterinary and Agriculture Office (CVAO) iti anti-rabies vaccination.
Sigun kenni City Veterinarian Dr. Brigit Piok, inaldaw ti maipatpatungpal a panagbakuna kadagiti aso ken pusa kadagiti barangay halls iti siudad ken iti opisinada.
Kinunana nga adda ti agturturong a vaccinators manipod iti CVAO kadagiti barangay halls tapno bakunaan dagiti aso ken pusa dagiti umili.
Dinakamatna a ti nasurok 40,000 nga aso ken pusa a nabakunaanen kontra iti rabis ket nangatngato no idilig iti datusda idi napalabas a tawen a dumanon ti 38,000.
Inyunay-unay pay ni Dr. Piok ti kinapateg ti panagbakuna dagiti aso ken pusa tapno maliklikan ti kaso a rabis.
Gapu iti daytoy, aw-awisenna manen dagiti maseknan nga indibidual iti panangipabakunadan kadagiti aso ken pusa a taraken dagitoy.
Maipalagip a nakailista ti siudad ti kaunaan a kaso ti rabis ita a tawen sadiay Camp 7 a nagresulta iti panangipatungpalda ti anti-rabies mass vaccination kadagiti aso ken pusa.
Kabayatanna, imbinglay ni Dr. Piok nga inirtenganda met ti kampanya kontra kadagiti walang nga aso a nagresulta iti panaka-impound ti nasurok 3,000 a walang nga aso ken pusa, malaksid pay iti panakakapon dagiti 559 ng aso ken pusa.
