BAGUIO CITY – Ngimmato ti bilang dagiti balod iti intero a rehiyon ita a tawen.
Sigun kenni Jail Inspector Erlina Las-egan, dadaulo ti Regional Community Relations Service Office ti Bureau of Jail Management and Penology-Cordillera, nangatngato ti 1, 177 a bilang dagiti balod ita a tawen no idilig iti nairekordda idi 2020 a dumanon laeng iti 1, 002.
Manipud iti pakabuklan a bilang, 487 ti adda kasona iti panaglabsing iti Comprehensive Dangerous Drugs Act of 2020 bayat a 245 dagiti nakumbiktar iti kaso a panagrames ken 83 dagiti naibalod gapu iti kasoda a murder.
Imbinglay ti opisyal a dagiti nadakamat a kaso ti kadawyan latta a mailislistada sipud pay kadagiti naglabas a tawtawen.
Innayonna a nakitaan ti panagbaba iti bilang dagiti Persons Deprived with Liberty iti rehion idi 2020 gapu iti napaingetan a restriksion nga intunda ti COVID19 pandemic.
Nupay kasta, in-inot manen nga umad-ado ti maipispisok iti pagbaludan gapu kadagiti napalukayan a pagalagadan mainaig iti COVID19.
Iti baet daytoy, impanamnamada nga umdas ti bilang dagiti pagbaludan iti rehion a mang-akomodar kadagiti balud.
